組長日式放題 (已結業)

銅鑼灣食放題，又唔一定要食超級大集團，有間組長日式放題都幾得意，新年有得玩魚蝦蟹，我哋就抽中左蟹腳同埋雞泡魚干。餐牌選擇都幾多。出面仲有得揀飲品、熱飲、水蟹粥、粟米魚肚羹以及甜品等。刺身叫咗好多款式，包括甜蝦、帶子、劍魚腩、油金魚、馬刀貝、象拔蚌以及三文魚。全部都好清新，特別係甜蝦最好食，估唔到劍魚腩係咪油甘魚呢類型嘅魚也做得唔錯。加埋抽中咗嘅蟹腳，有鹹香同埋鮮味，已經值回票價。鰻魚燒得幾香，無骨。甜番薯細細粒，甜味十足。菠蘿都好唔錯，酸酸甜甜十分開胃。仲叫咗好多壽司、包括鰻魚壽司、左口魚壽司以及和牛壽司。三隻都好正，當中最吸引我係和牛壽司，未至於入口即溶但係個味道好香，口感鬆化；左口魚都係好正！手卷方面都有蔥花吞拿魚同埋三文魚子海膽手卷，蔥花吞拿魚嗰個其實係拖羅，不過啲蔥花比較多；三文魚子海膽都唔錯，勝在夠清新。田雞腳原來仲可以炸幾盞鬼，絕對要試！食埋個好鬼肥膩但係又好香脆嘅雞軟骨就夠晒飽。最後食埋個朱古力糯米糍就更上一層樓，不過有少少硬所以唔啱老人家食。