365炸雞 (山東街) (已結業)

近排呢間炸雞店愈開愈多，本身認識佢係旺中分店既，旺中作為其中一個掃街天堂🧚‍♀️佢既炸物係獨樹一幟，特別既調味粉令佢真係殺出重圍，開咗幾間加盟店，就係靠總店師傅精研20年既小食技巧🧑‍🍳 小店位於山東街近麥花臣，附近睇波鞋行到攰就黎食下小食都唔錯👟門面好搶眼，有隻吉祥物大雞係招牌，睇得出品牌建立得都好有心思🐔 餐牌大大塊，左邊就係以雞為主，價錢大約2x到8x都有，比較大份，右邊都係簡單炸物小食，有薯餅、炸餃子、曲薯同埋炸燒賣等等，最平12蚊就有交易📖 🍗Shakeshake雞髀肉 | $39 | 7.5/10最出名就梗係炸髀，不過我份人好懶，就叫咗呢份雞髀肉，貪佢拆埋肉比我，唔使食到失哂儀態。肉質都算嫩，咬落外皮唔厚，幾有雞味🤤Shakeshake粉就放係旁邊自己落，可以逐隻試哂d味都得，有日本芝士、北海道咖哩、沙律芥末、川味辣粉同埋燒烤味，其中我覺得咖哩味最正，因為佢係日式咖哩，所以香得黎帶甜唔涸喉☺ 🍞Oreo西多士 | $28 | 7/10我見都幾多人試就叫埋，即叫即炸，仲見到店員哥哥係我面前即沾蛋漿🥚淋咗煉奶再加oreo餅碎真係極邪惡，有咗朱古力位就唔會死甜，好似美祿咁吸引我🍪