阿閒泰 (世貿中心)

營業中

休息中

世貿裝修完去咗呢度4樓嘅亞閒泰餐廳，餐廳嘅裝修都幾優雅，好多花花草草植物，淡黃色文青系嘅裝修，非常舒服！最緊要對住個海景，吃泰菜都可以輕鬆一下。香茅豬肉米紙卷，有塊紫蘇葉包住豬肉食，仲有啲菠蘿，味道幾清新，口感爽脆。炭燒牛肉配青芒果沙律，燒牛肉有濃郁嘅牛味，青芒果夠爽脆配埋泰式沙律汁，非常開胃，最緊要唔會太辣。泰式豬手，賣相夠正宗，不會有芡汁，有一隻滷水蛋同埋最重要嘅酸菜，$98嚟講份量幾大，豬手煮得夠淋，外皮依然有口感，最緊要旁邊有個泰式醬汁，鹹鮮非常特出。泰式棕櫚糖炭燒雞，上枱好大碟，新鮮嘅燒雞旁邊有啲腰果合桃，仲有啲棕櫚糖，糖味帶點焦香，同埋一片燒過嘅菠蘿，各種食物混合食，甜甜酸酸加上果香，十分特別，另外個泰式醬汁都好出色，好惹味！楊枝甘露沙冰配自家雪條，旁邊一條芒果味嘅雪條，楊枝甘露嘅沙冰個面有啲柚子味嘅珠珠，入口係熟悉嘅味道，但視覺及感官上又非常新奇。