王牌冰室 (南豐紗廠) (已結業)

龍鳳檸樂28蚊好耐冇試過響茶餐廳嗌呢個飲品， 冰底3片檸檬加半個咸檸， 甜酸鹹再加埋可樂嘅爆氣感覺真係好爽。王牌特濃沙嗲牛肉公仔麵36蚊聽聞黎呢度一定要叫，發現都幾大碗，而且牛肉都幾多 ，個汁望落去好似好辣但其實一啲都唔辣， 香料味都有。不過最驚喜嘅竟然係個公仔麵都幾彈牙，浸耐咗都冇變淋，唔錯。跟餐配牛乳炒蛋牛油多士同埋熱飲， 個炒蛋上枱係十分吸睛嘅，半生熟效果都幾滑， 唯一敗筆係偏鹹。點任何套餐加16蚊茶市晚市任食瑞士雞全翼！呢度嘅瑞士雞翼都幾大隻， 個汁都唔錯唔太鹹，但係都保持到濃郁嘅味道， 但我就覺得未夠入味同埋唔夠淋啦， 食慣咗啲入口即化嘅瑞士雞翼， 呢款呢就需要大家用牙咬啦！呢個優惠做到6月30日， 想試嘅就把機會啦。呢度環景其實都幾別緻我最鍾意呢一個燈牌！卡位就係古色古香嘅設計。座位都算尚算寬敞。