大滿喜日本料理 (已結業)

團年飯，搞搞新意思，同屋企人食放題，好多地方都book唔到位啦，最後嚟到觀塘是大滿喜。亞太中心呢度有好多間放題，呢一間都算坐得舒服，爸爸媽咪都讚個卡位好闊落。六點鐘嚟到，已經坐咗八成滿，都幾旺場喎。有啲放題有自助吧檯，雖然呢間就冇，但係以咁樣收費，絕對抵食。刺身真係非常新鮮，刺身嘅種類非常之多選擇，淨係刺身都有12款選擇，帶子每隻都好大粒，而且仲要好鮮甜，淨係蝦嘅刺身都有兩款，啱晒我蝦迷，虎蝦又大隻又超鮮甜啦。除咗一般嘅刺身選擇之外，最特別係仲有松葉蟹腳任點添，肥大肉厚。今晚同爸媽一齊嚟食，兩老特別大讚呢間放題有中式嘅食品，黃金蝦炒得好靚，啲蛋黃包住隻蝦，炒得均勻又唔會太油。串燒翠玉瓜真係推介，燒得剛剛好，配上孜然粉惹味十足。松葉蟹腳牛乳海鮮鍋（二人份量）呢個湯底真係令人地好驚訝，意料之外，好香濃嘅牛奶味，非常好味。入邊嘅用料都好豐富，又長腳蟹，特大青口……等。個湯底都依然係好回味，好重奶味，絕對推介！除罐裝同支裝嘅飲品，除咗有凍嘅梅酒同清酒之外，可惜冇熱嘅清酒，不過飲杯酒，輕輕鬆鬆咁樣傾計，都係賞心樂事！