Burger Shot

營業中

休息中

呢度附近都比較多小店嘅食肆，今日揀嘅係burger🤭🤭餐廳做緊嘅lunch set都望落幾吸引，但我哋因為晚市，所以選擇咗叫咗個二人餐。我哋揀咗煙肉千島芝士熱狗，安格斯牛肉芝士漢堡，薯條配蜜糖芥末，再加個吉列炸蝦。熱狗嘅包超級軟熟，而且芝士拉晒絲，佢嘅醬汁都好多。之前我都喺其他熱狗專門店食過，但我幾鍾意依一間嘅熱狗唔會太過鹹，食落去個調味啱啱好。再加埋千島醬有少少酸酸甜甜咁，都好開胃。安格斯牛肉芝士漢堡嘅份量都唔細，但係因為我鍾意一啖咬落去就可以食晒咁多種配料，所以唔會揀啲太巨型嘅，佢呢個嘅size就啱啱好。塊牛肉又厚又爆汁，真係值得一試。因為漢堡都幾驚喜，所以我另外叫多咗個炸雞蒜香野菌芝士漢堡。佢嘅配料好豐富，外脆內軟嘅炸雞配埋啲生菜絲都幾正。炸物全部都係即刻炸出嚟，上嚟嘅時候超級熱。薯條外脆內軟，配埋個蜜糖芥末，都幾好食。佢嘅醬都幾多選擇，下次都想試吓其他味。嘢飲我哋揀咗個白桃爆爆同埋梳打水。白桃爆爆有爆爆珠，白桃味有少量糖漿，加埋啲梳打水落去，特別清爽。如果想飲冇咁甜嘅人可以唔使搞咁均勻。如果餐廳有位嘅話都建議大家可以堂食，畢竟熱辣辣整出嚟一定係最好食。