小菜王 (福榮街)

營業中

休息中

呢晚專誠去深水埗揾嘢食，沿途見增煇大排檔一位難求。幾經辛苦嚟到小菜王，先等到張枱順利入座。論店舖環境，真係一般，一定唔會令人坐得舒服，但可以當係一種風味嘅。環境輸咗就從食物攞分啦！呢晚我揀咗炸墨魚餅、香露鴨舌及油泡田雞。熱辣辣嘅炸墨魚餅$88，外脆内軟，非常彈牙，墨魚餅充滿墨魚粒，真材實料，直情自己都做唔到。師傅好细心，配上沙律醬，登時令食味大大提升，夾配至極。香露鴨舌$68，非常適合炎夏的小食，簡直係佐酒名物。最驚喜係配菜，竟然用上酸薑，既消暑又醒胃，绝佳的配搭。讚！油泡田雞$93，好夠鑊氣，味道和分量都十足，绝無欺客。師傅用的是大號田雞，隻隻田雞腿都啖啖肉，真係食田雞食到飽。能夠喺深水埗呢個老饕集中地經常座無虛席，當中必定有其生存之道！雖然我住得遠，但都一定會返嚟試吓其他嘅菜餚。