瓏門冰室 (已結業)

今個星期六奶油包無聊約朋友出去行街，行街之前我哋決定食返個飯先，咁就揀咗近來好hit嘅龍門冰室。一去到龍門冰室門口，奶油包已經嚇咗一大跳，因為冇諗過龍門冰室可以咁多香港人支持，多人到排到去隔離門口，喺門口等位起碼有十幾二十人，所以都等咗大概15分鐘先至可以入去坐。坐低就喺度諗今日食咩好，見到佢餐牌其實都有好多嘢嘅選擇，但係奶油包同朋友兩個都唔係好肚餓，奶油包就嗌咗一個全日早餐，就係有仿鮑魚火腿通粉，再加煎雙蛋多士同埋嘢飲。呢一個認真介紹一下，因為佢多士其實係可以轉其他口味，例如奶油，例如花生醬，同埋蛋嘅話，你可以選擇炒蛋炒蛋白仲有荷包蛋同太陽蛋。奶油包嘅朋友呢就叫咗一個奶油豬餐，就有一個好巨大嘅奶油豬，同埋杯嘢飲。整體上嚟講可能因為實在太多香港人去幫襯呀，所以我哋等嘢食都等得比較耐，但係食落去個味道其實真係唔差，有個通粉既湯好夠味，太陽蛋煎得好脆口。題外話，龍門冰室嘅老闆真係好好，佢喺門口會有啲餅去畀大家夢遊嘅時候有需要食，甚至佢係有學生餐，只要你有全日制嘅學生證，你就可以免費去攞到一個餐蛋麵同一杯嘢飲。香港而家比較少有支持學生嘅食肆，所以撐香港一定要食龍門。