食之劇場餐廳 (已結業)

放假揸架車去西貢玩，諗住搵間有格調、食物質素又高嘅日本餐廳食晏。最後搵到呢間喺白沙灣嘅餐廳，係西貢過去好快就到。餐廳對住白沙灣，見到窗外遊艇泊喺度，景色非常優美，令到我個人放鬆咗。A4 和牛壽喜鍋呢個套餐有沙律同溫泉蛋做前菜，溫泉蛋嘅做法係慢煮，做到出黎既效果介乎熟同未熟之間，食落去連埋蔥花薑蓉同醬油，口感豐富，薑蓉提升咗溫泉蛋嘅味道，又唔會蓋過蛋本身嘅蛋味。壽喜鍋係今餐嘅主角，驟眼睇同平時食嘅壽喜鍋已經有分別，佢有樣唔同嘅係會有一碗生雞蛋俾你去點牛肉，呢個食法先係日本嘅正宗食法。套餐會俾一A4和牛上枱嘅時候，見到牛肉有少少生，將啲牛肉浸落壽喜鍋湯度，用熱力整熟佢，啱啱好熟再加上佢嘅油花幾多，放入口會feel 到佢嘅牛味、好滑同埋入口即溶。配料都交足功課，例如豆腐咁，佢都係做到滑身。附送嘅麵豉湯都好足料，大隻嘅蜆連殼放落個湯度，提升咗湯嘅鮮味。呢度嘅服務一流，無論係放置餐巾，定係講解食物嘅來源同煮法，職員會主動幫你安排好。順帶一提，揸車嘅人唔洗煩泊車，因為餐廳側邊嘅碼頭公眾錶位數量都幾多，容易係嗰度泊到車。