翠園 (銅鑼灣廣場) (已結業)

公司食飯，成班去飲下午茶，派出幾個使者包括我＋幾個同事去攞位先，1:30去到已迫爆山，但攞到第一張籌，2:00即入好爽！幾條友坐係到唔好意思既，叫定幾籠點心充撐場面，正想畫紙時見咁少野食，以為比漏點心紙即問部長，先知原來係有點心車！！！！！係失傳好耐(以為無晒)傳統懷舊既推車仔！再度重遇你～實在太好了～太感動了～！成件事就好似回到過去！浮現細個時飲茶叫點心行到去點心車前再拎住幾籠點心返位既畫面～！呆左陣已見到推車仔阿姐係面前，即起勢叫點心！推車仔姐姐都nice有街坊既味道！ 環境：地方好大但無睇晒成個場，格局係同現今酒家一樣偏西化，中西合壁，環境唔傳統，但來來往往既推車仔已是懷舊集中點。 食物：一開波叫左唔少點心，蝦餃、燒賣、鮮竹卷、排骨等常見既點心，份量適中有水準，蘿蔔糕用蒸，好健康餡料足，但用煎會更加開心同好食，芋頭角，已經少見個蹤影，見到就要食好味呀，老闆推介豆腐花必食，用木桶上，果然夠滑又好味。