阿來東南亞風味 (已結業)

同朋友喺旺角麥花臣球場打完波，超級肚餓，決定喺附近一間餐廳食晚飯。行到廣華街好景商業大廈附近見到呢間食東南亞菜式嘅餐廳，見到啱啱有位所以入咗去啦。餐廳嘅環境唔算好大，一眼望曬。由於太肚餓嘅關係，所以都冇慢慢睇菜單。餐牌見到有廚師推介就跟住點。點咗啲比較飽肚嘅碳水化合物，有飯同埋咖哩包。辣椒膏蝦頭油海鮮炒飯，叫飯類係因為想飽肚一啲。海鮮炒飯超級香口，散發出陣陣嘅海鮮味，特別惹味。呢款海鮮炒飯唔算非常之辣，可以接受。炒飯嘅份量ok多，可以兩三個人share大家都試啲。價錢方面58蚊。我覺得其實幾抵，呢個價錢出面可能只係食啲普通嘅炒飯。軟殼蟹火山包非常特別，一個大包入面滿載咖哩。咖哩入面裝著軟殼蟹。軟殼蟹都幾多，突曬出個包面。而最正就係啲包可以切開，再點咖哩，好有泰式風味。啲咖哩唔算好辣，睇落有啲蛋碎咁嘅樣，價錢係138蚊。飲品方面，點左椰汁三色冰。由於叫某幾碟小菜可以加九蚊點特飲，所以我哋都加咗9蚊，趁住夏日炎炎食杯椰汁冰解暑。椰汁冰有好香嘅椰子味，都算係濃厚。食泰國嘢配特飲真係一流！