嘉咸咖啡 (已結業)

近來鍾意蘇豪區捐窿捐罅搵食，俾我發掘到依間地點頗唔就腳餐廳。加上佢要上一趟樓梯先到，所以一般路人未必咁容易留意到。但正因為咁，依間鋪令人覺得有少少神秘感，而且店內格局亦令人坐得幾舒服，所以其實亦有好多人識得專登走幫襯。第一次係食晚飯，價錢意外地便宜，而且選擇唔少，不過有奇怪佢頭盤同主菜差唔多價錢。今次改為食午飯，價錢依然相宜，而且款式甚多，單係午餐就有十八款。是日本蟲揀一客好多食客都點忌廉雞絲菠菜麵，口感幾好，個汁做得濃而不膩，而且份量好。飯後照例有大杯餐茶飲，依度咖啡整得唔錯，檸茶亦都夠凍夠甜，下次如果時間鬆動我會考慮食埋甜品。