串酒里 (已結業)

今晚又出動捐窿捐罅發掘美食, 來到山林道依間隱藏於小巷之內嘅串酒里。餐廳大賣本地粗口啤, 更用上啤酒樽作店內裝飾, 入到嚟自然卸下返工嘅繃緊情緒, 係同朋友暢所欲言嘅好地方。把酒談心必然有美食相伴。呢度嘅燒蠔有成十個款式, 人多的話點個燒蠔拼盤就啱晒。今日我哋一行兩人, 就揀其中一款試下啦。 魚香肉碎燒日本廣島蠔$49/2隻蒜蓉、芝士燒蠔就食得多, 用上魚香肉碎燒實在少見, 口味偏重, 但一試無防。秘製汁燒鮑魚$99/2隻鮑魚肉質回彈, 有嚼勁, 加上秘製醬汁, 非常入味。鹽燒厚切牛舌$59 牛舌爽彈脆口, 熱度十足, 惹味非常, 再來一串都唔過份。椒鹽鴨舌$38鴨舌雖然無牛舌咁出色, 但亦鹹香脆嫩, 送啤酒一流。蒜蓉燒原條茄子$45 茄子非常厚肉, 用叉輕輕一拉就拉出一條條茄子肉, 質感柔軟, 蒜香味濃。芝士煙肉焗大啡菇$39啡菇肉厚多汁, 釀入一層厚厚芝士伴煙肉, 口感豐富。川式燒韮菜$25韭菜雖然唔算嫩口, 但勝在鮮甜爽口, 調味得宜。