星洲總廚 (聯安街)

營業中

休息中

辨完事午飯時間路過觀塘，一路行一路睇下有啲咩好食扮曬孤獨的美食家咁款😜，見到宜安街尾聯安街斜路有間食星加坡嘢好似幾吸引就決定入去試下。由於係一間地道小店，午飯時間裏面已經滿座，舖頭細細我一個人坐高枱冇所謂，伙記隨即遞上 QR code 俾客人落單，見招牌厚切8安士豬扒太陽蛋飯好似幾吸引就揀咗呢個，由於可能繁忙時間關係等咗10分鐘凍奶茶先奉上，再等多10分鐘碟飯終於來了，平時如果係返工時間食 lunch  我肯定扯晒火，不過今日下晝放假所以就算啦...😅，碟飯賣相唔錯，見到件豬扒條氣即時"鋸"返晒，厚切豬扒外層炸得香脆，內層肉汁鬆軟充滿口感，當堂覺得花20分鐘等待係值得嘅，秘製豉油汁加蛋黃撈飯亦都係非常之好嘅配搭，食完大滿足即刻合十講句“我食飽喇”.....😊🙏🏻😆