潮樓 (已結業)

我都算係潮樓的「粉絲」，無論係早/下午茶的點心，抑或係晚市小菜，我都覺得唔錯。食物的質數唔差，每次都會有一兩碟特別驚喜；服務又ok；又唔收茶芥加一，所以都冇咩可以再挑剔。今日朝早同媽媽飲茶，兩個人，叫左四碟點心。叉燒飽($5)：特價點心。得一個，不過比平時d叉燒飽大一些。冇咩特別，叫佢只係因為佢特價。糯米卷拼饅頭($5)：又係特價點心。(注意：以上兩款點心九點前至供應！) 上枱既時候只係微暖，不過都幾好味。煎蘿蔔糕拼煎餃子($12)：呢款就比較失色啦，上枱已經凍冰冰。餃子好細隻，同埋因為凍左，所以好油。蘿蔔糕尚可，幾香蘿蔔味。叫碟蘿蔔糕好過叫雙拼。芋茸煎堆仔($10)：呢碟就係今日的驚喜之作。四個煎堆仔脹卜卜，炸得金黃，一d都唔過火。咬開一啖，仲出緊煙架！d芋茸份量剛剛好，又唔太甜，食左兩個都唔覺「漏」。下次會再encore！服務幾好。一去到七點個批客仲未走，所以d侍應都比較忙；九點半之後好好多(同埋靜好多！)。侍應答問題都幾有禮貌，例如問佢地d點心有咩材料，有幾多件咁，全部都答得好清楚。結論：係一個又抵又好味的早餐！