樂天大喜屋 (已結業)

前幾日想食放題，就同朋友嚟咗旺角呢間樂天大喜屋度dinner。價錢每位$228加一，晚市放題黎講都算係抵食。首先落單見到刺身、壽司、一品料理、炸物嗰啲一應俱全。揀咗幾款我鍾意食嘅嘢之後，係等緊食物嘅同時，我就出咗去夾一啲熟食同埋拎飲品啦。雖然知道放題食刺身先係回本位，但見到啲熟食我都係忍唔住夾咗啲，有咖喱魚蛋、蠔皇薯仔牛肉、甜酸齋同埋波波腸。牛肉有驚喜，估唔到可以煮得咁淋，仲好有牛味。刺身我主要都係食三文魚多啲嘅，三文魚好厚切，正。朋友就鍾意食帶子多啲啦。呢到有好多壽司食，除左普通款之外仲有啲創作壽司，例如鰻魚玉子燒，同埋啲卷物。花之卷都有得任食！我平時少食炸野，所以天婦羅就主要都係朋友食。串燒我就叫左雞軟骨同埋牛舌，灑上少少檸檬汁都已經唔錯。有任食嘅雪糕同甜品可以拎，不過如果要Haagen Dazs 或者Movenpick 就要落單點，只限每人一杯。我地本身諗住最後先點，點知到last order嗰陣唔記得左！好彩店員好好人，肯照拎比我地，咁我就有Movenpick食啦！