囍 (已結業)

前排聽朋友講起去左觀塘食一間日式火鍋，百幾蚊就可以食哂火鍋刺身雪糕放題，一次過滿足哂香港人想食好多款唔同食物既慾望，所以今晚就渣車同朋友去左食。雖然位置唔係最近觀塘市中心，但渣車去都幾方便，仲有三個鐘免費泊車。我地兩個揀左個$168既中位價火鍋，有無限任添既肩胛牛肉、牛舌、黑豚肉、黃金雞同海鮮拼盤！湯底都有好多款，有黃金雞木瓜椰子湯、蕃茄湯、木魚湯、壽喜燒、濃蝦湯，四川麻辣湯、韓國泡菜湯等，好多選擇，花多眼亂，最後我地揀左蕃茄湯，蕃茄味十分濃郁。$168呢個鍋仲可以加$39蚊刺身放題，但我同朋友都比較細食所以無加，雖然$39刺身放題，但都有幾款刺身食，例如三文魚、甜蝦、魷魚、鯛魚。我地坐低無耐，職員已經好快上菜，首先試左佢個肩胛肉同牛舌先。肩胛肉同平時既肥牛好唔同，唔會一大舊脂肪，但又好有牛肉味，我地食到最後個鍋都無乜油脂，或者污漕野。另外，牛舌真係無得輸，好少日式火鍋有牛舌，牛舌好快恰一恰就食得，好爽口，好有口感同牛味，認真推介。食完牛，d雞都熟，開始食雞，我地兩個人佢都比左半隻雞我地，雞肉好嫩滑，似平時啊媽買既新鮮雞，一d雪味都無，而且醃得岩岩好，唔會太咸遮埋d雞味，都係必食之選。