泰色食 (已結業)

泰國菜一向係我嘅最愛，今日經過呢間新開嘅泰國菜餐廳，見到新張期內免加一服務費，而價錢又唔貴，就一於入黎試下啦。餐廳位於水星街，位置相當易搵。餐廳面積唔算大，佈置以簡單泰式擺設為主，由於去嘅時間尚早，唔需要等位，但食到中段已經見到要排隊了。我地一行兩人，叫左兩個小食，冬蔭功湯及青咖喱雞配蒜蓉包。泰式白雲鳳爪 :泰式鳳爪一向係我嘅最愛，鍾意佢無骨啖啖肉，鳳爪份量都幾多，入口酸酸辣辣，非常惹味，一份真係唔多夠。泰式炸蝦餅 :蝦餅即叫即炸，上檯時熱辣辣，蝦肉爽口彈牙，而且唔會太油，點埋泰式甜酸汁，六件話咁快就清晒。冬蔭功湯 :食泰國菜又唔可以唔飲冬蔭功湯呀？冬蔭功湯有兩個size揀，分別係例牌同大，我地兩個人揀左個例牌，份量都算多，每人都可以分到兩碗。冬蔭功湯香料十足，配料有蝦及菇，上檯時仲夠熱，入口又香又辣，非常好味。青咖喱雞配蒜蓉包 :青咖喱雞上檯時傳來陣陣椰奶香味，咖喱非常香滑，味道唔太辣，雞肉相當多，蒜蓉包即叫即焗，入口外脆內軟，配上香濃既咖喱汁食簡直係絕配。原本想叫埋甜品，但已經飽到食唔落了，埋單都唔駛三百蚊，真係好抵食。