幸鮨屋 (已結業)

今日同同學上完堂之後，諗住喺學校附近試下一啲平時冇食過嘅餐廳，所以當我哋見到幸鮨屋呢間日本菜小店嘅時候，就決定入去幫襯。 我哋當時幫襯嘅時間大約係下晝六點，人流尚未算多，地方雖小但係都整齊有條理，而令我最印象深刻嘅係門前嘅各種高達擺設，可能因為店入面全部都係後生仔，所以先喺店入面增加一啲男仔玩意嘅設計，但係正正就係因為呢啲設計，成個進食環境比到我一份親切、溫暖嘅感覺。 咁係食物方面，我就叫咗一份自選壽司拼盤、美國安格斯牛小排同埋一杯梳打。首先，成份自選壽司拼盤入面有一份六件嘅 壽司、一份刺身同埋一碗丼飯，整體份量其實都幾多幾抵食壽司材料同埋刺身都幾新鮮，而我揀嘅嗰碗蟹肉蟹膏飯，啖啖都係鮮甜嘅蟹肉以及濃郁嘅蟹膏，食落非常滿足。至於嗰份美國安格斯牛小排本人都比幾高嘅分數佢，首先佢哋所用嘅石板令到上面嘅牛肉唔會太快熟，避免左牛肉擺太耐而變老變柴變靭嘅情況，再加上佢哋所選嘅牛小排品質唔差，粉嫩嘅牛肉入面有足夠嘅牛味，鍾意食牛嘅朋友一定唔可以錯過。