德興日式放題鍋 (已結業)

由於今日比較遲食下午茶，所以我們要喺宵夜時段先食晚餐！我們去咗旺角創興廣場嘅「德興日式放題鍋」食宵夜放題！店內有兩個區域分開，分別係火鍋區同燒烤區，而我們揀咗火鍋區，湯底係可以選擇鴛鴦鍋，我們揀咗日式豬骨湯同昆布清湯，至於肉類方面我們就揀咗極上美國牛肉、黑豚肉同鷄腿肉，另外再升級咗海鮮放題！揀完邊款牛肉餐之後，我們就去咗出面嘅自助區域就擺放咗多款火鍋配料，款式種類選擇都幾多有：冷盤前菜、沙律、丸類、菇類、蔬菜、麵類等等等等⋯⋯除此之外仲有多款甜品有：和菓子、泡芙、冬甩、蛋糕、雪糕等等等等⋯⋯全部都處理得幾乾淨衛生！主角終於嚟到喇，極上美國牛肉嘅肉質相當鬆軟嫩滑，牛肉味亦好濃郁！黑豚肉嘅肉質比較爽滑，肉味都幾香濃，但感覺就油膩啲啲！鷄腿肉嘅肉質都幾軟滑，味道比較清淡！另外再升級咗海鮮放題就有鮮味嘅青口、爽滑嘅帆立貝、相當爽甜彈牙嘅大蝦同值得推介嘅三文魚，因肉質非常肥美嫩滑，而且有好香濃嘅魚油香味，真係好正呀！