三才魚蛋粉麵

營業中

休息中

都未試過未消化完嗰餐就要寫食評！同朋友誤打誤撞咁嚟到呢間三才魚蛋粉，見門口有人排緊隊就肯定食得過，於是我哋就排埋一份。排緊嘅中途已經有個叔叔話幫我哋落單，等咗幾分鐘後就有位坐，仲要一坐低就即刻有得食！絕對啱哂香港人咩都要快嘅精神！今次我同朋友點咗一碗牛腩雲吞粗麵、魚蛋墨魚丸粗麵、一碗淨西洋菜餃同埋一碟芥蘭。牛腩雲吞粗麵嘅牛腩夠淋；雲吞嘅蝦好爽口；粗麵估唔到嘅麵質好滑，成碗都好好味。朋友就比咗魚蛋墨魚丸吞一粒我試，魚蛋好彈牙；墨魚丸彈牙之餘，仲食到入面有一粒粒嘅墨魚好有咬口。而西洋菜餃入面超多西洋菜，好好味！最抵嘅係下午茶，叫一碗麵可以三揀一咁跟多樣嘢，包括嘢飲、油菜或者魚皮，好抵食。我哋叫咗咁多都只係$131，抵到爆。