富臨漁港囍臨門酒家 (已結業)

今日初一, 本來諗住同媽媽去荃灣寶蓮食齋, 但實在太多人, 等咗好耐都無位, 老人家唔企得咁耐, 於是轉黎富臨食晚飯。 見到餐牌有個4人蛇羮套餐 $418, 啲餸睇落都幾好, 唔想諗咁多, 於是就點咗呢個套餐。雖然去唔到齋舖食齋, 喺度都食同素鵝, 份量不少而且炸得好脆, 幾好味。個蛇羮好大煲,唔係好覺有蛇肉,辣辣哋, 可能落咗好多薑, 普普通通啦。呢個咖哩羊腩炆得好林,薯仔又好入味, 而且真係用羊腩整, 唔似有啲食肆求其用啲一舊舊既肉整又話係羊腩,死死實實, 呢度呢個餸俾到驚喜我。醬燒琵琶鴫半隻, 都好大隻, 味道唔差。古法龍躉件, 以為做套餐都唔荒多, 點知又係鬼咁大碟,蒸到啱啱好, 個餐好抵食呀!個餐牌明明話係浸菜苗, 但係黎到碟菜係大大條既菜心, 好彩都幾淋, 老人家都食到, 又係好鬼大碟。呢個蟹粉小籠包係全個餐最差, 個賣相好差,亦唔覺有蟹粉。整體覺得呢個套餐好抵食,款式多而且做唔到咁大碟,6個人都夠食。