貴川風味館 (已搬遷) 新店位置

尋日走入元朗搵11妹食下午茶，11妹帶我咗去教育路的“貴川風味館”食米線。貴川風味館下午茶時段超抵食，叫一碗米線35蚊起就有指定飲品送，而且叫小食有特價優惠。抵食都要睇好唔好食，好等我介紹下我哋兩個食咗d咩先啦～經典貴川酸辣紅薯粉+豬扒，薯粉口感唔同出面比較有咬口，口感豐富d，如果大力夾起d米線都易會斷。豬扒唔乾，大大塊，香口有肉味。另一碗叫了惹味熱拌米線(無湯)+豬大腸，拌麵做到好乾身，唔咸，份量夠多，米線用拌麵食法都有咬口，係爽嘅，唔淋。豬大腸乾淨，仲好入味，呢碗拌麵果然係惹味喎。小食方面，椒鹽豆腐特價時段係$12，炸出嚟唔油，個皮好脆口，豆腐嫩滑，上枱20分鐘入面仲係熱，呢個好得。至於天婦羅茄子，調味唔錯，外脆內軟，因為茄子嘅關係相對豆腐吸油d，不過都好好食。整體上11妹話呢間下午茶時段係好抵食，就算正常時段嚟都唔算太貴，性價比高。味道方面，如10分滿分的話，11妹畀到8分，唔怪得貴川風味館深得元朗街坊喜愛啦～