火五越式牛肉粉專門店 (其昌樓)

營業中

休息中

平時尖沙咀返工，周圍食嘅嘢都食到厭晒，所以今日就去佐敦睇吓有咩好食，決定試吓呢間越式餐廳。店舖唔大，但係座位闊落，有空間感都坐得舒服。食物方面選擇都幾多仲有午市套餐價錢都係介乎四十幾至五十幾，加$10仲可以揀特色飲品。《火五火車頭牛肉粉》$68本身係河粉底，我哋轉左檬粉，湯底唔好睇佢清清地，但好濃郁，好香炸蒜味同埋香茅味，夠晒越式風味，牛肉好正，好薄好林，想讚一讚過牛丸超彈牙多汁，好好味。《香茅美國黑毛豬扒撈檬》$56食越南嘢點可以唔食越式豬扒，呢個豬扒好正，好入味好香，亦都好重香茅味，正！食落又唔會太鞋，撈檬可以自己加醬汁。《黃金蝦球》$48/5pcs有5件份量都幾多，呢個真係超好味，因為即叫即整所以好夠熱，蝦球非常新鮮，食落勁爽口又嫩，再加上外面層炸漿好薄，所以口感非常好。跟餐嗌左兩杯椰子冰，好好飲，椰子味同埋椰奶好香濃，重點係唔覺得好甜好膩，推薦大家飲。