James Kitchen (已結業)

有朋友介紹厚福街新大廈H8有間餐廳叫James Kitchen, 話個lunch好抵食, 每款$45, 有新野當然去試下, 環境唔錯, 坐得舒服, 雖然望出去景觀麻麻, 但內裡裝修簡潔, 感覺良好。白菌煙肉忌廉汁長通粉個忌廉汁好好味, 唔太溜, 濃度啱啱好, 長通粉仍有咬口, 唔太淋唔太硬, 有時食吓d簡單菜式, 就會知道間餐廳嘅功架, 食完呢個長通粉就對呢度有信心。葡式香辣非洲汁雞扒焗飯賣相真係唔討好, 如果唔係個friend介紹我食, 見到都反感, 不過食落又真係好食, 個辣汁辣得啱啱好, 好開胃, 食咗一啖之後真係會追住食, 大家都爭住食呢!加$10就有甜品, 咁就食咗芒果cheese cake, 真係好好食, 唔太甜, 味道適中, 感覺清新, 有酒店水準, 想encore order多件, 但已賣完, 唯有下次再食。