LAB10 (已結業)

朗豪坊 Lab 10 有個 $99 午市燒肉放題，進食時間七十五分鐘，真心抵食。燒肉方面，最好食係五花腩同雞翼，前者夠肥美，後者甜辣醬夠惹味，其餘仲有豬肋骨，豬肩，排骨，豬柳，雞扒同雞腎，全部正常水準正常味道。蔬菜自己出去拎，我最鍾意粟米，夠甜；冬菇燒完都香口，不過火喉較難控制，好易燶；翠玉瓜，雞髀菇同茄子燒熟後感覺就較為乾身少少。熟食都係自己出去拎，最正係細細粒嘅炸飯糰，香草味濃郁，好好食；炸物仲有薯條同麥樂雞塊，正常味道。沙律同菠蘿片雖然都係普通貨色，不過食完咁多肉之後食下蔬果，可以略減油膩感。三款漬物（醃蘿蔔，醃青瓜，泡菜）略嫌唔夠入味。至於甜品，brownies 朱古力味唔夠濃，棉花糖呢...用筷子篤住嚟燒，呢個我畀滿分😙。要 order 嘅熟食有肉醬意粉，白飯同豆腐湯，由於實在太飽，我只係叫咗個湯，不過比想像中辣好多，飲咗一啖，已經要放棄😹。放題仲包一款梳打，大大杯👍；另外要讚嘅係上菜速度頗快，服務亦良好，無煙燒烤又唔會食到成身味。總括嚟講，性價比算高。