紅茶冰室

營業中

休息中

佐敦食午餐唔係太多選擇，紅茶係我地比較常幫襯既一間，等位時間短，食物種類多，價錢合理係佢最大既吸引力。今日叫左個常餐豬扒通粉配多士同炒蛋，塊豬扒好大塊，就咁食完塊豬扒其實都已經飽左一半，通粉個湯係好濃郁既豬骨湯，好夠味。不過個人覺得塊豬扒另上可能會更加好，因為煎完都幾油下，浸左係碗粉到搞到Ｄ湯底都油埋。炒蛋有好香既蛋黃味，而且有少少流心，火喉控制得唔錯。朋友叫左午市套餐蒜蓉雜扒配薯菜，雜扒係牛＋豬扒，薯菜係焗薯，Ｄ扒好大塊，成碟野勁大碟，賣相同味道都唔錯，都幾驚喜！焗薯都好好食，不過女仔食的話應該會食唔晒。跟餐有餐湯同野飲，咁豐富既午餐連埋野飲先＄５０，仲要唔洗加１。野飲方面叫左係出面比較少見既熱杏霜，跟餐唔洗加錢，佢沖得都幾杰，睇得出落左好多杏仁粉，飲落同出面Ｄ中式糖水鋪賣開既二三十蚊杏仁茶差唔多味，非常推介。