田中寿司 (已結業)

經過荃灣天橋比冷風吹到好凍，真係要食返啲野暖吓。荃新天地一期既田中壽司，交通方便，入咗商場冇兩步路就到，見到佢哋新推出嘅冬季限定名古屋赤味噌鍋，真係好吸引！名古屋赤味噌鍋，二人前鍋物有牛腸、腐皮、自家制雞丸，另外仲有豚肉、野菜、日本年糕系無限追加。四種辣度湯底，白、辛、激、獄，可供選擇，照顧到食辣同唔食辣嘅朋友。套餐主食仲包括胡麻豆腐沙律，尤其喜歡日本豆腐，豆味濃郁且口感細膩。田中血合系用咗吞拿魚嘅血同埋肉撈埋，充滿鐵質營養，第一次食好特別！完全冇腥味，口感層次都幾豐富，有肉既質感。本鮪三貫盛：包括赤身、中拖羅、大拖羅，十分新鮮！串燒有雞軟骨同冬菇秋葵。尤其喜歡燒秋葵，燒得好入味，中間仲保留秋葵獨有滑屢屢口感。食完鍋物，用剩咗既湯底精華加入白飯，雞蛋，芝士，撈勻煮1-2分鐘，就變成好好味既味噌芝士飯，口感似risotto,好味又滿足，勁欣賞呢個食法！最後系紅豆鯛魚燒，魚型賣相幾好，新鮮熱辣，外脆內軟，紅豆蓉飽滿香甜。