好媽媽台灣館 (已結業)

中午經過都有幾個人排隊，就決定試試。入到去覺得環境幾雅緻，枱面上仲貼左一啲令人窩心嘅句子，有媽媽feel。麵線大大碗，蚵仔幾鮮味，大腸鹵得好入味，好好食，令人失望係成碗麵線偏向鹹，最後食剩下大半碗。由於個大腸幾好食，我地決定叫多一碟大腸小食加一杯台式飲品，只係加多22蚊。必食推介，菜脯蛋pizza，岩岩上碟好熱，香味四溢，表面好似炸過，食落少少脆同有蛋香味。另外我地叫左個套餐，滷肉飯跟雞翼同半隻鹵水蛋，鹵水蛋同雞翼味道係正常，唔算突出，滷肉飯我反而覺得唔夠鹹又唔夠汁，之前係台灣食嘅滷肉飯會鹹啲同多汁啲，旁邊有少少酸蘿蔔青瓜解下膩。飲品方面，一杯珍珠奶茶，一杯芋香奶茶，兩杯都覺得太甜，可能因為台式飲品都係偏甜，個人覺得少甜會好啲。價錢就OK，食左咁多嘢係154，所以中午都幾多學生幫襯。