Wheatfield X 羅宋湯專門店 (已結業)

我其實都好鍾意飲羅宋湯，但係羅宋湯多數都係用牛嚟煲嘅，唔食牛嘅我就比較少選擇。今日經過中環呢間羅宋湯專門店，佢竟然有豬骨湯底嘅羅宋湯，好開心！本來諗住係去第二度食麵包做午餐，即刻轉軚，試吓呢間羅宋湯專門店有幾巴閉先。Menu上都有幾款套餐為主，但係湯類就分為四大種，有羅宋湯分為牛腩及豬骨兩款口味，另有紅菜頭湯同俄式清雞湯。朋友叫了一個全日特惠套餐$72， 唔算平！包任何一款羅宋湯+薯仔沙律+甜餐包+熱飲賣相就麻麻地，羅宋湯味道偏甜，薯仔沙律好一般，餐包完全冇特別，只可以話食完都算飽嘅！我就叫了一個自由配搭套餐$62一個湯底可配麵、烏冬、飯或餐包。叫完之後都有少少後悔，因為原本專程嚟係為飲咗羅宋湯，但加咗烏冬之後好似冇咗個真正意義，湯又唔夠熱又唔多雜菜，烏冬又唔夠彈牙，食到滯滯地嘅感覺，最奇怪就係嗰三塊乾淨淨鞋口嘅䐁肉，無好過有！