譚仔三哥米線 (德福廣場2期)

營業中

休息中

今日和同事在LUNCH 出去睇野，睇完後就諗住買外賣返公司食，點知度度都排長龍俾錢，後來見到呢間唔使排隊就入去買個米線返公司食喇。我點了一個豬潤米線，再額外加左一個口水豬脷再叫左杯凍檸蜜添。咁打完票後就在門外等候，雖然唔使排隊買票，但都要足足等了十五分鐘外賣才到手，在隔離其他食店既話，雖然要排隊買飛，但最後應該都仲快過呢度可以拎到外賣，真失策！佢好在係湯還湯，米線還米線分開裝，如果唔係啲米線就腍晒了。米線就冇腍，豬潤有五塊左右，切得好薄，食落好鞋，佢應該煮得太耐，鞋到似沙紙。口水豬脷又係切得好薄，薄到完全食唔到豬脷既味道，只得辣味，口感似食雞腎咁硬，唔知以為食緊雞腎。凍檸蜜就中規中矩，冇咩特別，總括黎講，又要等咁耐，又唔係平，仲要質素咁差，應該冇下次了。