Beerliner German Bar & Restaurant (已結業)

同朋友抽咗兩個鐘波，打到肚餓。呢間以前食過，味道唔差而且環境好，又唔多人，就食返個豪華下午茶。『德式鮮菜沙律』($88)內有松子，紅菜頭，無花果同紅洋蔥夾生菜做底。汁醬和口感配撘得不錯。『德式燒豬手配香腸拼盤』係推廣套餐，$388 跟兩杯啤酒或無酒精雞尾酒。豬手好大隻，燒得皮脆肉嫩，鹹味恰到好處，仍然係呢度招牌。德國腸就白色嗰隻好食啲，質地緊實啲之餘，又有濃厚嘅香草同香料味。紅色嗰隻就稔啲，食落有啲似司華力腸。薯條同酸椰菜大路味道。飲品揀咗無酒精嘅『Vitamin C』，用香蕉，橙汁同糖漿調制。沙冰夠凍夠refreshing ，但糖漿味道似乎蓋過咗香蕉同橙嘅味。