蠔站 (諾士佛臺)

朋友話帶我去諾士佛臺「蠔站」鋸吓，心諗酒吧區食蠔實大出血啦？點知上到7樓發現係性價比爆燈嘅寶藏餐廳！一打美國生蠔$120即係$10蚊隻，雖然有少少海水腥但完全接受到，重點係蠔肉爆膏程度拍得住酒店級，抵到想同老闆講：「你咁定價真係有賺㗎可？」😏
.
🐮牛魔王必試PRIME級12oz肉眼扒🥩，Medium火候控制得超準，切開粉嫩唔流血水，咬落去肉汁多到好似噴泉咁（誇張咗少少但真係Juicy）。最驚喜係冬陰功海鮮意粉🍝酸辣味好過癮，青口同蝦仔份量都唔hea🤣 仲有啤酒味薯條🍟夠晒gimmick，雖然麥味唔算突出，但即炸脆卜卜真係停唔到口！
.
飲品方面🍇巨峰梳打同🍑白桃乳酸打都好解膩，尤其巨峰味甜到似初戀～埋單人均$400樓下，喺諾士佛臺呢個地段真係抵到笑，以後Happy Hour多個落腳點啦！👯