佢嘅裝修風格同一般嘅台灣料理店好唔同，唔係走懷舊嘅台灣風，係有少少新派比較Modern嘅裝修，見到佢喱度既客人大部分都係一d年輕嘅客人或者外國人嚟食，中環分店個空間唔算好大，數埋都係得十張枱，難怪經常大排長龍
招牌牛肉麵 $108
佢個濃湯幾特別，帶有微微嘅藥材味再加好香濃嘅牛肉味，幾好食既，牛肉都炆到好淋，幾有台灣古早味嘅感覺，不過價錢就真係幾貴，性價比唔高，亦說不上好特別可以一試
滷肉飯反而有驚喜，滷肉炆到好入味，肥嫩多汁，細細碗當個小食都唔錯！
髒髒芋泥鹹蛋黃蛋餅
佢個蛋餅好好食好有驚喜，冇諗過台式蛋餅可以做出一個甜品，佢個外層係用咗麻薯去包住，中間係雞蛋，入面就係芋泥，配埋一齊食落口好煙韌，紫薯控既朋友必食！佢喺個紫薯粉上面再加咗少少煉奶，令到成個口感好豐富，好有創意，好特別好好食，而且賣相一流，係打卡必點嘅創意料理！😋
