牛角次男坊 (荃灣廣場) (已結業)

今日嚟到荃灣呢一間新開嘅牛角次男坊，食佢哋好出名嘅燒肉丼，平時嘅刺身丼就食得多啦，燒肉丼都係第一次食！我同朋友一人叫咗一個，我叫咗一個西班牙豚梅肉丼，配上佢嘅燒肉汁！另外我個朋友就叫咗個美國肩脊肉嘅主打牛角次男坊丼，堪稱係招牌！而我哋都有配有一個味噌湯，價錢都唔超過$100一位，其實都唔算貴喎！先講咗個味噌湯先，我懷疑係因為配合香港人嘅口味，所以個味增湯唔算好鹹，幾好，相對容易入口！個牛角次男坊丼一上枱就令到我哋兩個都覺得好驚喜，啲肉砌到鬼死咁高，而且冇一忽望到入面既飯，肉嘅份量真係超級多！仲有幾條有少少似七味粉味道嘅辣椒條係上面，配上肉同白飯食一流！而佢既美國肩脊肉真係燒得剛剛好，而且肥瘦比例好，配上燒肉汁食真係好惹味，不過我都幾建議大家可以試吓吾加燒肉汁，就咁食佢嘅原味，我相信絕對唔會令你失望，食返本身燒肉嘅鮮味！至於個西班牙豚梅肉丼賣相就冇前一個咁突出，不過味道亦都唔差過佢，相對牛肉來講，豚肉嘅肉質更加滑，加上中間嘅流心蛋食簡直一絕！而且都係分量十足！整體來講，兩個都好好食～