文記傳統車仔麵 (已搬遷) 新店位置

男友睇o左友人寫呢o度同肥媽甜品o既評價後,話想搵日o黎,咁尋日(21-2-09Sat)又冇咩做,而且近排佢又想睇戲,於是決定o黎呢o度.我o地大約1:00pm o黎到,都未係太多人,我問亞姐有冇煎釀三寶,佢答未出,要四,五點.啊,咁我要車仔麵啦,揀o左油麵,生菜,豬皮,金錢肚同豬頸肉,盛惠$28.00.男友想食腸粉,咁我又買o左$6.00.由於男友嗜辣,想要咖喱魚蛋o個隻辣醬,於是我出去攞一湯匙畀佢.好喇,開餐喇,金錢肚,豬皮夠腍,而豬頸肉,竟然係最突出,佢唔油,又清清地o既,真係唔錯.而湯亦好清,但清得o黎又有味道,唔錯喎.而腸粉就滑滑,亞姐重會幫人加埋甜醬同麻醬,重要係唔吝嗇o個隻,好正啊.然後男友話想飲豆漿,啊好啊,呢o度係支庄,$8.00一支,同男友share.味道又係清清o既,唔太甜,但好解渴,唔錯啊.服務:要自己出去叫餸同即畀錢,但會幫你拎入去,態度亦冇問題,唔錯.環境:牛頭角邨呢啲舊公屋,單位好細(自己都住過同類型o既),所以預o左會迫.地下有啲滑,小心行就得喇.衛生:算係咁啦.