肉餅哥小炒料理 (已結業)

仲記得細細個媽媽成日煮餸總有一道菜係蒸肉餅，因為夠哂簡單又好味，而家雖然工作忙少左返屋企食飯，但一返屋企食飯都會有肉餅食，所以數數手指我一個月最少有十日都食肉餅，好似離不開我既三餐一樣。而家愈開愈多專賣一味既餐廳，我成日覺得一間餐廳要做得好又出色，只賣一樣野再加少少創意想法就可吸客，依開餐廳開正係我公司附近，有我最愛既肉餅做賣點，如何叫我不去吃？今日同同事夜左收工黎左依度食晚飯，等左一陣就有位啦，一入店內，已全場坐滿，枱櫈之間都有少許迫，我地叫左兩款唔同口味既肉餅，而飯就叫左菜飯同油飯，飲碗湯暖下胃先先送上老干媽肉餅，好香既炒豆豉放左係肉餅上，食落鹹香味濃，夾一塊肉餅配住菜飯食好滋味，肉餅肥瘦適中，煎過後入口好香脆，肉脆邊位係咬緊都聽到脆口聲，菜飯份量多，每啖飯都有菜絲，食落無菜青苦味，有肉有菜夠哂均衡食食下就送上足三兩花膠肉餅，賣相真係當堂嘩一聲，好大塊花膠鋪滿煲仔面頭，份量好大份，食落軟熟膠質豐富，味道濃郁而不會太鹹，蒸肉餅厚度適中，入口啖啖肉帶少話肥肉，有陣陣油香味，送住油飯大啖食正啊，物超所值!