松記糖水店

營業中

休息中

幾年前食過松記嘅薑汁撞奶，攞到嚟嗰時好似腐竹蛋糖水咁稀，完全唔係凝固狀態。我問店員姐姐，佢話我哋嘅薑汁撞奶係咁㗎! 激到我死死下! 尋晚女朋友話要食糖水，我唯有去冒多一次險。餐廳都算大，但啲枱凳好迫。如果幾個大男人坐就一定會膊頭撞膊頭，其他枱嘅客人要出出入入都要讓一讓。熱芋頭紫米露($28)芋頭夠淋夠粉，紫米露夠多紫米。椰汁味都濃，而且唔算太甜。算係咁。熱生磨芝麻糊($20)一間糖水舖好唔好食，睇佢芝麻糊就可以見真章。首先稀杰度算合格，唔會太甜，而且冇燶味。唔會全碗係芝麻，一定會加粉，但唔會食到成口粉漿味，算唔錯。