蓮香棧 (已結業)

有日帶左媽咪去蓮香棧整返一盅兩件飲杯茶食個包。呢間茶樓仲有姐姐推蒸爐車、煎點心車、糖水車、甜品車，真係咩回憶都返曬黎！最搞笑嘅係D點心姐姐會以類似譚仔話咁唱賣點心，fing 找排吉飯～ 行咦肉扁飯～🤣🤣🤣得兩個人飲茶食得唔多嘢，只好重點揀d最想食嘅。而炸芋角係必點‼️呢間茶樓嘅炸芋角係非常好食🤤外面鬆脆輕盈，中層芋泥綿滑濃郁，最入面包住惹味嘅五香韭菜肉碎，好好食啊💃🏻💃🏻💃🏻另外我最期待嘅係煎點心車嘅煎魚餅，味道唔係好突出，但係係我嘅童年回憶😌細個唔可以成日食煎炸嘢，唯獨是去飲茶可以係煎點心車度揀一樣，個一刻望住架車推近埋黎，我對眼係發曬光咁🤩通常我都會揀煎魚餅，兩張雲吞皮夾住魚肉粟米，煎到兩邊金黃脆卜卜，成架車嘅選擇入面煎得最脆口就係呢樣😝