點心放題可以任食兩個鐘，而且只係98蚊，真係點都要試試。
餐館位置鏞記旁邊，好易搵。甫入室內，樓底極高，分設上下兩層，布置充滿懷舊色彩，最突出的係放左隻大大隻綠色垃圾蟲，真係好有親切感！
由於我地預早訂檯，所以侍應安排了我地坐舒適的梳化卡位，抵讚！
食物方面，分別有：來佬推介、懷舊點心、湯、精美點心、粥麵飯同甜品等六大類合共31款食品，種類話多唔多，話少唔少，其實只要點心質素對口胃，多少選擇唔係問題。經過多輪點選進食之後，我地都覺得極有水準！
最大力推介的有以下幾款：
＊蟹籽鳳眼餃：開口的蝦肉餃上灑上蟹籽，皮薄料足，幾次番點，仍然好回味，實在係必吃之選。（散叫一籠要32蚊，食多幾粒已值回票價！）
＊來佬菠菜餃：來佬推介，當然亦值得一試。果然，咬開餃子，全是嫩綠鮮菠菜蓉，好味！
＊鵪鶉蛋燒賣：難得有呢款懷舊點心又點可以錯過呢？細細粒鵪鶉蛋附以小小豬肉燒賣，一樣無令人失望！
＊脆皮鮮蝦春卷：細細條，蝦肉足，又脆口又熱辣辣，正！
＊中式湯：原本無諗住叫湯飲，但睇見佢寫住無味精，即管試試！一奉上來，見有湯渣（豬骨、木瓜、南北杏），感覺完全唔欺場，飲落無味精，好鮮甜，好有住家老火湯ＦＥＥＬ！結果，飲完，再叫多一次，真係好滋味。
＊陳皮紅豆沙：最後一擊的糖水，同樣好有水準，紅豆起沙又稔身，唔太甜！
其實，水準平實但唔差的仲有鳳爪、蟹籽燒賣王、蝦餃等。反而，煎物唔多好食（生煎鍋貼同胡椒九菜盒子），偏油，不吃無損失。
我地今次的策略係每次叫四款，每款各叫一粒或一件，吃完又抖下，結果，前前後後落左七八次單，加上我地完全無食過任何飽肚的點心（腸粉、飯麵、飽點等），結果兩小時後，我地都好滿足，但又唔覺飽到頂住個胃！
埋單，每人15元茶錢再加一，兩人收費249元，真係超抵食啦～
