無敵家

營業中

休息中

老公應該又掛住日本喇，所以今晚佢就帶我去居酒屋食飯。入到去餐廳已經播住日本歌，見到好多酒樽做擺設，木枱木櫈，仲有樓上閣樓，裝修懷舊，感覺好warm。餐牌都幾多嘢食，另外仲有廚師推介。老公就點左個沙律、兩款廚師推介、串燒、拉麵同飯團。無敵家招牌沙律：沙律菜洗得乾淨，燒粟米切開左一塊塊容易食，裡面仲有桃同蕃茄等蔬果。上面有隻溫泉蛋，撈勻食到好香蛋味，醬係和風醬汁，酸酸地，做前菜幾好。明太子燒豆腐：豆腐燒到熱辣辣好香，上面鋪左明太子夠晒味道。汁燒雞胸軟骨串：胸軟骨係雞胸果個三角位，咬落勁爽口，配上汁一齊燒好好食。厚切牛舌：餐廳比較講究，只會用牛舌前面果節做串燒部分，食落厚身有口感，已調味，好味。豬軟骨豚骨拉麵：豬軟骨好淋好軟熟，拉麵質感煙韌，豬骨湯底又唔會太鹹，整體都OK。三文魚(上)及明太子(下)燒飯團：飯團外層用醬汁燒，燒到有飯焦香，脆口。三文魚燒飯團每口食到三文魚醉，另外明太子味突出，兩款都唔錯。