呢間懷舊咖啡室，可給後輩一份新鮮感！
一入到去，唔係報紙中影得咁大，分開高、低層，中間有幾級樓梯相隔，下半層有些卡位，坐得舒服一點，又可望到舊式油燈，真夠懷舊！
牆邊掛上膠牌，室寫上各式各樣飯類！
其實，呢度嘅食物普普通通，跟茶餐廳差唔多，飲品琳瑯滿目，甚至鮮有喺市面飲到嘅滾水蛋、奶水蛋.....等等！純粹富有懷舊特色而已！
快餐：茄汁豬扒炒蛋飯 $33
自選兩款食物：腸仔、豬扒、火腿、瑞士雞翼、雞蛋 ( 可要求炒蛋或煎蛋 )...等等；配一款汁：豉油汁、茄汁或黑椒汁；可選白飯或意粉。
一上枱，碟飯都幾大堆頭，有些少烚椰菜、一塊大豬扒、一大件炒蛋，淋上師傅調製嘅茄汁。豬扒夠薄又入味，但係有點硬；
炒蛋好大塊，估計用兩隻蛋炒成，炒完對摺再對摺上碟；白飯軟熟之餘又有飯香，令人開胃！
至於茄汁比較遜色，與茶餐廳貨色差唔多，落咗少許淡色番茄粒，並非鮮紅大番茄，難免有點失望！
熱鮮奶 +$3 ( 原價 $13 )
飲品種類繁多，亦有樽裝鮮奶。現時已經買少見少，好似絕跡超級市場及便利店；以前，樽裝鮮奶要回樽，可能浪費人力物力及成本；漸漸被紙包裝屋仔鮮奶取替！熱鮮奶係熱飲當中比較健康一款，呢度用上維記鮮奶，牛奶牌子中較為濃味嘅大牌子，略帶微甜，加熱之後，隔咗一陣，會見到奶面有一層薄膜；細細個嘅時候，最鍾意就係食呢層薄膜！
吞拿魚烚蛋多士 $13
餐牌有另一款較為受歡迎嘅芝士蛋沙律醬多士，反而，我鍾意食吞拿魚先叫呢款。一塊普通方包烘一烘，cut 開兩塊，搽上牛油，吞拿魚加上沙律醬，均勻地舖上包面，再以大約半隻烚蛋切片，小心翼翼放上而成！雖然烚蛋淡而無味，但係比較炒蛋、煎蛋健康得多！成件多士清清淡淡，帶些咸味，一試無妨！
奶央包 $6
另一款鮮奶央包多 $2，貴在用一塊薄薄鮮牛油放在方包面，感覺好 heavy！而奶央包以一塊普通方包，搽上鮮黃色牛油，再加上奶油。牛油帶出咸香，奶油帶出甜味，配合淡味方包，既簡單又美味！可惜方包並不是想像中軟熟！
熱朱古力立克 $10
熱好立克、阿華田、谷咕呢度都有，唯獨是朱古力立克好似幾特別，叫來一試！味道未及阿華田嘅香濃朱古力味，又未至於像谷咕嘅朱古力水；就算唔加糖亦夠甜，好立克味完全被掩蓋！加上黑白淡奶，口感不失香滑！
一走出去，就係綠色鐵皮檔，售賣特色貨品如唐裝衫、童裝飲衫......等等！
