百芳池上便當 (御海灣)

好耐冇去過台灣，真係會掛住臺灣嘅便當，仲記得喺台灣買便當非常便宜，幾年前去大約為返港紙廿蚊就有一個便當，香港賣台灣便當就要五十幾蚊，不過當買返個回憶味道。

今次揀咗鹵水雞翼便當，雖然鹵水雞翼得三隻，但係配料非常多，有菜、粟米、粉絲、肉碎、菜脯、蘿蔔絲，仲加埋半隻鹵水蛋，拍得住喺台灣買嘅便當，一樣好多配料

鹵水雞翼便當

$55

鹵水雞翼醃得入味，其他配料都有醃過，非常美味。

55蚊仲會包一杯茶飲品，今次揀咗茉莉綠茶微甜，綠茶味道幾香，而且只加咗少少糖漿，啱晒我口味

鹵水雞翼便當配茉莉綠茶

$55

呢間舖頭只係喺戶外設有少量嘅枱，應該都係主要做外賣嘅多，佢嘅包裝非常結實，值得一讚。