吉列牛忌廉烏冬專門店 (百樂中心) (已結業)

之前成日喺ig見到人地食吉列牛，另外知道個忌廉烏冬都好似幾出名就想嚟試一試。今次同一個朋友嚟食，佢話之前食過覺得幾好食就拉我嚟再食一次。既然佢係吉列牛忌廉烏冬專門店，梗係要兩個都點嚟食下。⬇️咖哩忌廉牛肉烏冬⬇️個忌廉烏冬嘅一層雪白忌廉睇落好治癒😂雖然睇落好似好heavy, 但其實佢冇我想像中咁厚，佢係打到好似泡泡咁。忌廉下面就係咖哩烏冬同牛肉。撈埋一齊食之後，忌廉同咖哩出奇地夾，好creamy好好食😍，而且牛肉份量都好多。⬇️吉列牛定食⬇️定食有少量前菜、白飯、麵鼓湯同一份吉列牛。白飯上面有埋飯素比較好下飯。個吉列牛只係邊邊炸好咗，入面仲係紅色嘅生肉所以要用佢提供嘅小爐煎熟佢，放上去好快就熟可以食。外面個邊炸到脆，但入面就好軟熟，而且好有牛肉香。之後我地都有叫多兩個小食⬇️牛油蜜糖單骨雞翼⬇️雞翼有好香甜嘅蜜糖味，而且佢係單骨雞翼所以食得都幾方便，落埋檸檬汁就更好食。⬇️蒜片牛舌芯⬇️薄薄嘅牛舌微微烤焦，食落好香同唔會太硬太乾身，而且有埋蒜片同葱嘅關係食落好香口。