唔知係咪閒日問題，成間餐廳得我地兩個人，好似包左場咁。
我地當然係坐Sushi Bar啦，可以同師父面對面睇佢地手握壽司，係食壽司當中視覺上的一大享受。
2
我就叫左呢個Set，共有10件壽司同前菜丶飯丶甜品。
順帶一提，呢間餐廳的壽司本身已經配上赤醋，建議大家食壽司時唔需要沾醬油，因為大部份壽司已經由師父配上特製的醬汁。
前菜係竹筍丶腐皮加上醋，酸酸甜甜，幾開胃。
開黎三道前菜，左面的醬汁煮螺係凍食，醬汁甜甜地，螺肉肉質結實新鮮。
中間的松蕈三文魚子，松蕈食落冇咩味道，但三文魚子幾甜，而墊底的蘿白蓉都冇咩味。
右邊的大根幾甜，龍蝦丸好結實，清清地開左個胃，準備食壽司。
薑，有別於坊間採用的薄片，呢度係塊狀同條狀，不辣，清清味蕾非常好。
1
第一道壽司係真鯛，肉質結實，而上方配上昆布，食落味道清淡而不會膩，作為第一道壽司，正正符合作為壽司十連發當中「起」的角色。
順帶一提，第一道壽司最大的驚喜係見到師父用上了「本手返五手」的技術去握壽司，即刻令我眼前一亮
握壽司係我最愛的日本料理技術之一，而「本手返五手」是了解一間壽司店的師父技術水平的指標之一。「本手返五手」是指師父先用手拎起材料(魚或貝)，沾上山葵放於掌中(本手)，另一隻手將醋飯快速置於魚生上(二手)，魚生及醋飯之間壓一下(三手)，把壽司反轉，再壓一下(四手及五手)。當師父年資愈老，能把五手減為四手或三手，以提升壽司的味道層次而不會令醋飯鬆散。鮨森的師父既然用上了呢道技術，接下來的壽司更令人期待。
1
深海池魚非常有驚喜，比起係東京食的池魚肉質更肥美。由於係採用厚切的方式，所以更特顯魚身的肥美和飽和，適合沾上少量山葵。
貝類最重要係食材料的「鮮和甜」，而呢道赤貝絕對非常新鮮。可以見到赤貝的肉質好飽滿好厚，配上淡淡的醬油好好味。但相對比下，醋飯的量有少少不足夠襯扥，如果醋飯份量多番少少會比較好。
1
每次係香港食吞拿魚都唔太喜歡赤身，因為9成都比較腥。但作為一間壽司做得到位的餐廳，鮨森的赤身都做到一個新鮮的味道出黎。食落口一D都唔覺得腥，就算佢切得好厚都唔會覺得有腥味，而且食落口冇筋，令我對赤身改觀。
1
金目鯛肉質比較肥，所以用上火灸的方法逼出魚身的油脂及香味，配上梅醬及芽蔥，為舌頭帶來又肥美又清新的口感，味道上的平衡很到位。
1
中拖羅一向係我最愛的壽司之一，而呢道中拖羅我只可以用「超級美味」呢四個字去形容，加上少許的山葵，食落口真係做到入口即溶的感覺。舌頭帶來一種肥美的香氣，吞口水的時侯重感受到一種肥美的香氣流入喉嚨。
之後師父黎多左碟大拖羅(唔好意思...唔記得影就食左落肚)，相比之下反而覺得今次大拖羅冇中拖羅咁肥，肉味比較重，但油脂味都好重，所以最好都加上山葵進食減低油膩感。食落口絕對冇筋，入口即溶，齒頰留香。
1
三文魚子軍艦又係一道沖擊，三文魚子顆顆分明，食落口卜卜聲。而紫菜好香好脆，係握壽司前有翻熱過，保持脆身。由於師父已經係三文魚上沾上醬油，而且醬汁之中有少量柚子，所以係絕對唔需要再加醬油去破壞佢既鮮味。認真既，真係好鮮好甜好好味！
1
海膽軍艦一放上台，我心入面真係「嘩」左一聲出黎：「好多呀！」海膽可以用「堆積如山」去形容，滿滿地蓋著醋飯，師父抹上少量醬油，畫面同顏色令人流哂口水。細數大約有10塊海膽係壽司上面，即係大約兩個海膽的精華放哂係一舊壽司上面。我首先夾起一兩塊海膽就咁食，海膽可以成塊夾起証明佢真係好新鮮唔會水汪汪。除左「鮮甜」之外，我真係諗唔到可以點形容，放入口中慢慢品嚐，真係令人好滿足好感動。食左幾塊之後決定成舊軍艦放入口，成個口都感受到海膽味道的攻勢。但係海膽的味道有少少比紫菜的香味搶左，呢個始終係海膽軍艦無法解決的問題之一。
1
1
話咁快黎到最快一道的海鰻壽司，令人不捨。海鰻本身包上竹葉，所以帶有陣陣竹葉香味。熱熱的鰻魚香味一向都令人欲罷不能，加上海鰻本身油脂的香味，為呢10道壽司畫上完美的句號。
1
食完哂10號壽司都唔係好夠喉，差D忘記了我地個套餐重有煮物同飯。呢道汁煮魚鮫的魚肉一絲絲丶嫩滑。油份唔算太重，而醬汁幾濃，有少少咸。但係配菜上有紅蘿白同白蘿白，帶來少少的甜味，平衡番咸味。不錯！
海鮮醋物係成晚菜式中比較不懂欣賞的一道菜。入面有蝦丶墨魚丶西芹同紅蘿白，醋味可以清清之前咁多道菜的餘味，但係味道冇咩特別。
1
櫻花蝦丶三文魚子同埋飯原來可以咁夾，口感包括蝦花蝦的香脆同埋三文魚子的鮮脆，配上粒粒分明的調味飯，三扒兩撥就食哂！肥妹話佢飽食唔哂，我重可以食埋佢個半份添。
1
最後一道係單點的厚燒牛舌，牛舌燒得好香，加上厚切的原故，所以非常Juicy，牛舌的肉質好軟，配上黑胡椒同埋台鹽調味，加埋配碟的芥茉食唔會覺得好油膩。非常好食！
味噌湯味道冇咩特別，但入面的豆腐好嫩好滑。另外餐廳都幫我地換左隻大杯去飲抹茶清膩，的確有心去做服務。
1
最後送上兩道雪糕甜品，椰子雪糕入面食到一粒粒的椰子肉，而芝麻雪糕都好香。感到飲飽食醉了。
埋單，每人1000，荷包乾堂了........
