金池上海京川滬料理 (已結業)

27-7-2009幾經常一個人食飯, 好少幫襯京川滬菜館, 除咗因為質素參差, 食物大部分更屬「家庭」份量, 唔通入去淨叫碟銀絲卷咁混吉麼? 見呢度供應三十幾四十蚊的一人份量午市及麵餐, 試試醉雞擔擔麵 ($40) 吧.醉雞: 見有唔少雞翼位置, 大喜. 雞肉嫩滑, 雞皮就太厚, 一舊舊肥油的感覺真係麻麻, 而且整體其實唔多入味. 唔差, 但絕對可以更好.擔擔麵: 麵條賣相黐埋一餅嘢的, 不過食落彈牙, 口感不錯; 湯底好重花生味, 極少辣 (連我都覺得唔辣, 嗜辣的記住加辣!), 肉碎落得好少, 味道都幾「悶」. 不過呢度係嚴重缺乏上海 / 四川 / 京川滬菜館的九龍城, 算吧.食物一般, 環境就係衛生 ok 的「摩登茶記」格局; 招呼就好唔錯, 店員哥哥態度好得令我有點打冷震, 哈哈哈. 好在呢度發現得唔算遲, 放低 $40, 有機會試試 dinner 都好.