食美軒 (已結業)

食美軒喺何文田太平道，近旺角東站。雖然餐廳門面比較「其貌不揚」，但入到餐廳又另一番光景。裝潢古樸風雅，座位寬敞舒適，燈光明亮，同街外靜謐環境成鮮明對比。我哋四個人訂咗兩個「金秋蟹宴」2人套餐。【酥炸蟹皇蓋】炸到金黃色，香脆外皮入面全部係蟹肉絲，個蟹蓋有返咁上下深所以蟹肉都相當多，啖啖蟹肉好滿足～【蟹粉小籠包】每個小籬包都用個蒸籠仔裝住，好cute～隔住皮都望到小籠包入面橙黃色嘅蟹粉，真正皮薄餡靚，咬落去入面幾多湯汁。【雪裡藏龍】好有武俠小說風格嘅菜名，雪即係蛋白、龍即係蝦仁，蛋白香滑蝦仁都幾多，最特別係味道類似珍珠葉嘅配菜，連埋蛋白一齊食又幾夾。【蟹粉豆苗】蟹粉量都幾多，差唔多覆蓋晒全碟豆苗，豆苗都幾鮮爽。【臘味煲仔飯】秋冬必食嘅煲仔飯，好大煲，有齊臘腸、膶腸、臘肉、臘鴨，天氣轉冷食感覺暖笠笠。最後仲有【薑茶湯丸】，享受甜品，驅寒暖身。不管外面秋風瀟瀟，飽餐一頓，嘆吓茶傾吓計，度過溫暖滿足嘅一晚。