順興海鮮飯店 (已結業)

是日生日，同老婆仔仔去左大澳一日遊，6點鐘出去梅窩走左班船，要等1個鐘，就去左熟食市場諗住食個快既，有2間，睇完食評選左順興，諗住快快手食完就簡簡單單叫左個2人餐加支大啤，反正一家3口都好細食...第一樣到既係白灼蝦，一上檯...得6隻，不過係中蝦唔係出面d細細隻，心諗：會唔會中伏呢？食前先影相，等埋其他野先起筷，再黎打孖蘭花花枝同炒蜆一齊上，唔等條魚起筷先啦，因為趕時間，先食蝦怕凍唔好食，一食有驚喜，爽口鮮味，再試炒蜆，好細隻，但係好味冇沙，又唔似出面果d一味得個咸字，西蘭花花枝片都好爽口入味。條魚到，賣相真係好一般，都唔知係咩魚，但一入口，蒸得岩岩好，好滑，連我個唔食魚既死仔都起勢夾魚（可能佢肚餓瓜..），除左個送既例湯冇咩味，其他竟然係驚喜之作！重要無敵海景！但最值得讚既係由老板娘至落單阿嬸都好好禮貌，好nice!!食完7:15，埋單358連大啤，極度滿意！