泰妹餐廳 (置富嘉湖) (已結業)

天水圍嘉湖置富商場近期經過全新裝修， 裏面開咗一間唔錯嘅泰國餐廳《泰妹》。裝修幾靚幾光猛， 而且座位又夠寬敞， 一家大細嚟食飯坐得好舒服。呢度嘅食物種類非常之多， 前菜叫咗一個非常開胃嘅酸辣去骨鳳爪沙律， 去骨鳳爪非常爽脆， 另外調味方面用咗魚露、青檸汁同埋辣椒， 食落酸酸辣辣， 非常之醒胃。泰式生蝦刺身係食泰國菜必點嘅項目，生蝦新鮮， 味道鮮甜， 加埋生蒜片同埋酸辣汁一齊食， 令人份外開胃。呢一個熱辣辣嘅冬蔭海鮮湯非常足料， 裏面有大蝦、青口、魷魚、蟹柳、蕃茄等材料，鮮味滿分。馬拉盞炒通菜， 夠曬惹味， 泰式嘅馬拉盞有如香港嘅蝦膏，帶有咸鮮， 令 簡簡單單嘅炒通菜生色不少。一個原隻菠蘿海鮮炒飯係今晚嘅亮點， 菠蘿炒飯入面加入咗大量鮮菠蘿，甜度十足。另外亦有多款海鮮配料， 有大大隻嘅蝦同埋青口， 仲有不可或缺嘅肉鬆，飯粒多4乾身飽滿，令人非常滿足。總括嚟講， 呢一間泰妹除咗食物質素唔錯之外， 價錢亦相當之公道。 除咗散叫之外， 仲有二人套餐， 保証大家大飽口福。