PizzaExpress (已結業)

如果你問我，邊一間餐廳啲 pizza好食，我會揀Pizza Express。雖然係連鎖店，但係水準好過好多高級意大利餐廳，個皮又薄又脆，無得頂。Pizza Express我去過好多次，但係都只係食Pizza，未試過食意粉。上星期喺灣仔開完會，啱啱食午飯時間，間間餐廳都爆。經過Pizza Express，見有位，於是入去。中午Lunch set，有沙律加pizza或意粉，然後跟一杯飲品。我惗住試下新嘢，叫意粉啦，點知立即中招。芝士青豆沙律，ok嘅，但係嗰碟肉醬意粉就真係好唔得喇。肉醬個顏色橙橙地色，望上去已經好唔對路。意粉煮到糊仔咁，唔駛旨意會Al Dente。咬入口，唔甜唔酸，得個咸字，無乜味道，仲難食過茶餐廳啲茄汁意粉。結果係食唔完碟粉，番到公司要再煮過公仔麵。估唔到pizza得，意粉會咁唔得。無辦法，俾一個苦面。